1 Corinthians 15

Keliso 'ina toholo hila weyahina

1Ciyagwao, tetelaina yahepwaila pwaiyeya 'oimiya, wanuwatuhuyahi 'abehega mwalo 'atemi watagwaleya tetelaina 'oina, ma 'i'abihe pa'aligomiya ta 'oinega 'ami 'abihetena walobeya, 'eguma tetelina wa'abiyahiya. Ta 'eguma geya wa'abiyahi pa'alina, 'imi hemisaowedi gide ginaula bwagabwaga.

3Tetelaina lamuna ya'ita lobeya 'oinega yahepwaile 'oimiya 'abehega Keliso 'ida puiyao weyahidi 'i'amasa, gidemusa Buki He'asisi 'ina hepwaila, 4ta galiha silaguya, ma sabwelo hetoina 'oina 'itoholo hila, gidemusa Buki He'asisi 'ihepwaila 'esa.

5Citoholo hila ma Pita 'i'iteya ta wete 'ana tohepwailao site tuwelo si'iteya. 6Caigeda tuta 'oina 'iyadao wete site paibi handeledi si'iteya. Bodaedi 'oidiyega baibaiwadi bewa tuwa simiyamiya, ma tupwadi si'amasa.

7Yemesa wete 'i'iteya, ta wete Keliso 'ana tohepwailao mabwaiyadi si'iteya. 8Ta 'ebe losaloha taugu wete ya'iteya, ma hesi taugu 'igu tole 'ebe henainaida, geya gidemusa taudi 'idi tuta silobeya ta sitoleya. 9Ta wete taugu loheya galagu. Weyahina Yehoba 'ana tohemisao ya'abihe muyemuyediya, 'oinega Keliso 'ana tohepwailao mabwaiyadi sibwebwe'ana sinegauwa. 10Ma hesi Yehoba 'i'atemuya muyaegauwa ta 'ilemegauwa. Coinega geya 'i'abihete daidaisigau, weyahina yahemisa bwaibwaina ma tohepwailao mabwaiyadi 'idi paihowa ya'ebesineya, geya taugu 'igu waiwaiyega, ta Yehoba 'ina helau 'oinega.

11Coinega tohepwailaedi 'oimiya siloguguya pwaiya, ma taugu wete 'oimiya yaloguguya pwaiya, ta Keliso wahemiseya.

Toholo hila weyahina

12Cima guguya 'oimiya 'ahepwaileya 'abehega Keliso 'amasega 'itoholo hila, ta wahemiseya. Ma to'aha weyahina tupwami wagwae 'abehega tomota geya sawasawahidi ma 'amasega sitoholo hilama?

13Weyahina 'eguma tomota sahena 'amasega sitotoholo hila, Keliso wete 'amasega gesowana 'itoholo hila. 14Coinega 'ima loguguyaedi tuwa ginaula bwagabwaga, eeta 'imi hemisaina Keliso 'oina beno hemisa bwagabwaga. 15Wete tauma Yehoba 'ana tohepwailao 'a'abowegomiya 'ima gwaeyedi 'oidiyega, weyahina 'agwaeya, “Yehoba Keliso 'amasega 'i'abi hetoholo hileya,” ta to'amasaedi geya sida toholo hila. 16Coinega Keliso wete gesowana 'itoholo hila. 17Ta Kelisoina wete wahemisa bwagabwaga, ma 'oinega 'imi puiyao tuwa 'abwa simiyamiya 'oimiya.

18Ma 'iyadaowedi taudi mwalo Keliso sihemisaeya ta si'amasa pwaiya, beno ta'eha simiyamiya?

19Ta wete tauda Keliso 'ana tohepwailao nuwa'ole'oleda, 'eguma Keliso 'ina 'abihetena 'oida tuta bewa bale'umo weyahina, ta geya tuta 'inaonaoma 'ida 'amasa mulina weyahina.

20Ta 'ana dumwalu hesi beno Keliso 'amasega 'itoholo hila, tauna 'ihanugeta ma muliyetega to'amasao mabwaiyadi.

21Weyahina loheya 'aigeda tuwa 'oinega 'amasa 'ilatuwa bale'uwa, beno Adama, ta wete gidemusa loheya 'aigeda 'ina paihowega toholo hila 'i'abilatuheya. 22Tasanapu pwaiya 'abehega Adama 'ina pui 'oinega tauda 'amasa 'oida 'ilatuwa, ma hesi Keliso 'oinega yawasida hataya talobeya.

23Ta yawasi hataya 'ina tauya bewa gidemusa, nugeta Keliso 'itoholo hila, ma 'abwa tutaina 'ihilama tauda taiyawedi 'ina bodao wete tatoholo hila. 24Ma muliyetega Kelisoina nata toloinao mabwaiyadi 'ihewaiwai sinedi gide welabana ma hi'ahi'a ma yaluyaluwa galadi mabwaiyadi 'ihewaiwai sinedi, ma tuta 'ana 'ebe losaloha 'oina Keliso 'ina 'ebeloina 'i'ebwae Tamana 'oina.

25Weyahina Kelisoina nata ma'ina waiwai 'iloiloina eema 'ana siga 'ana 'alehaowedi mabwaiyadi 'ihewaiwai sinedi, 26eeta 'ana 'ebe losaloha 'amasa 'ihewaiwaisine ma 'igumwala.

27Weyahina Yehoba loina mabwaiyana Keliso 'i'ebwaeya. Beno tuwa Keliso gesowana To'ebwayaina 'iloiloinae. 28Coinega 'abwa tutaina Keliso ginaula mabwaiyadi 'iloinaedi, muliyetega tauna 'itagwala Tamana 'ina loina 'oina, weyahina Tamana Keliso 'ina loina mabwaiyana 'ana to'ebwaya, 'oinega Yehobaina 'ihane hedade.

29Ta 'eguma to'amasa sahena sitohotoholo hila, to'aha weyahina tomota sibabitaiso to'amasao weyahidi? 30Ma wete togidega taugu? Ceguma gesowana 'amasega yatoholo hila to'aha weyahina 'ebe hesilae 'oina tuta mabwaiyana yapaipaihowa Keliso weyahina?

31Moisa, sabwelo 'aigeda 'aigeda 'oidiya gide ya'ama'amasa, ma hesi ma'igu yaliyaya 'omi 'imi toholo pa'ala weyahina, 'ida Bada Yesu Keliso 'oina.

32Ta wete mwalo Epeso 'oina loheloheya gamwagamwasowalidi totopwatula gide silolo'alehegau, ma hesi lo'alehaina geya 'ana bwebwe'anamo 'oiguwa 'eguma geya 'amasega yatoholo hila! Coinega tupwana tomota sigwae 'abehega 'ilobwainegita ma tuta bewa bale'uwa tayaliyaya 'ida 'ai ta 'ida numa 'oidiyega, weyahina nata 'amasa 'ana tuta, gesowana 'aigeda wete to'aha talobaloba.

33Ta hesi gwaeyedi beno 'abo tuwa, 'oinega sahena 'oidiyega si'abowegomi, tabu ta mumugadi galana wahe'au'aunaowedi. 34Nuwana tupwami Yehoba wahenainaideya. Bewa 'ebe debamwadina 'oimiya, 'oinega 'ilobwainegomiya ma wada sanapu, ma mumuga galana walolagu.

Wahi hauhauna

35Ma tupwami geya wanuwanuwa sabwalena toholo hila weyahina, 'oinega wagwae. “To'amasaedi to 'wapi 'oinega sitoholo hila?” 36Coinega 'ilobwainegomiya ma wada sanapu 'abehega 'eguma patu ta'uma ma 'ibwala 'abwa patuina 'imwahulu. 37Wasanapuya 'abehega 'eguma pegapega nuwana 'aigeda patu tadauni, 'wapina 'oinega 'ibwala, geya patu nugenugetaina 'ana 'ita gidemusa, ma hesi hagana, 38weyahina toloina tauna Yehoba, ma 'aiwe ta pwatula 'aigeda 'aigeda 'adi 'ita 'ina nuwatuhu gidemusa, ta 'ilagudiya.

39Ta wete wahi Yehoba 'iloinaeya, tomota wahida hagana ma hagana, hebahebai wahidi hagana, bwasumo wahidi hagana, ma silahana wete wahidi hagana. 40Ta wete megalewa wahidi hagana ma gogo gabulena wahida hagana, wete 'adi 'ebe hepwatu hagana tauda 'oidega. 41Ta wete hala 'ana hepwatu hagana, ma wai'ena 'ana hepwatu hagana, ma 'ipwala wete 'adi hepwatu hagana ma hagana.

42Cida toholo hila wete gidemusa, wahida mwahumwahuludi sigaligalihedi, ma 'abwa 'eguma tatoholo hila wahida gesowana simwahumwahulu. 43Moisa, wahida 'ebe debamwadina ma we'awe'aidi sigaligalihedi ma 'iyamo wahida galewa tatotoholo hila, ma wahidaedi ma'adi hepwatu ta waiwaidi, 44weyahina wahi bale'uwa sigaligalihedi ta wahi galewa sitotoholo hila, weyahina wahi bale'u hagana ma wahi galewa hagana. 45Buki He'asisi 'ina hepwaila wete gidemusa 'igwaeya,

“Loheya nugenugetaina, Adama wahina mayawasina; ma loheya heluwena yaluyaluwana 'oinega sowasowana yawasida 'i'ebwaegita.”
46Loheya yaluyaluwana geya 'ilatu nugeta, ma hesi wahida 'ihapwesa nugeta ma yaluyaluwa muliyetega. 47Weyahina loheya nugenugetana Yehoba 'ipaihoweya bale'u 'oinega, ta loheya heluwena galewega 'isuluma. 48Mabwaiyada Adama tubunao bale'uwa tamiyamiya, 'ada 'ita mebale'u gidemusa, ma wete wahida hauhaudi galewega 'abwa ta'ewadi, 'adi 'ita gidemusa Keliso wahina hauhauna.

50Ciyagwao wanuwatuhuyahi 'abehega wahida bale'uwa 'imwahumwahulu gesowana 'iluhu galewa, weyahina wahi bale'uwa mwahuluna, ta wahi galewa geya 'ida mwahuluwa. 51Ma wete sanapu hauhauna yahe'itegomi 'abehega gesowana tohekalesiyao mabwaiyada ta'ama'amasa, ma hesi tupwada 'abwa mayawasida tamiyamiya ma Yehoba wahida 'ida buidi. 52Weyahina tuta 'ana 'ebe losaloha 'oina yoguli 'ida mu'a madouna, ma Yehoba wahida 'ida bui mwayamwayauwedi, ma wete to'amasao mawahi hauhaudi sitoholo hila, ta tauda mayawasida wahida wete 'ibuidi. 53Weyahina Yehoba sawasawahina wahi mwahumwahuludi ma 'ama'amasidi 'ibuidi ma si'ehau ta miyamiya hatayadi. 54Ma 'abwa tuta nage 'oina Buki He'asisi 'ana 'ahwa moisa 'ilatu, beno 'igwaeya,

“Tauna 'abwa 'ihewaiwai moisa ma 'amasa 'igumwala.
55Weyahina gesowana 'amasa 'ihehewaiwai, ma hesi 'amasa 'ina gala 'oida 'igumwala.”
56Camasaina 'ina waiwai 'ilatuwa mumuga galana 'oinega, eeta mumuga galagala 'ina waiwai beno Mosese 'ina loinao 'adi ligeha 'oidiyega. 57Ma hesi 'ida Bada Yesu Keliso 'i'abihetegita ma galanaina 'oinega tahewaiwaisine, eeta Yehoba 'oina taloyauwedo madouna.

58Ma wete 'iyagwao yaloyauwedo madouna 'oimiya ta yaguguyegomi ma watoholo pa'ala ma tuta mabwaiyana wada hetapewa Bada 'ina paihowa 'oina, weyahina 'abwa Bada 'ina paihowaina 'oinega huwaina taloba.